Кӑҫалхи кӑрлач уйӑхӗн 1-мӗшӗнчен пирӗн республикӑра патшалӑх учрежденийӗсенче ӗҫлекенсен шалӑвне ӳстерӗҫ. Хушӑва Чӑваш Ен Элтеперӗ Олег Николаев ӗнер, кӑрлач уйӑхӗн 12-мӗшӗнче, алӑ пуснӑ.
Асӑннӑ документра окладсен чи пӗчӗк виҫине тата ӗҫ укҫин ставкине 6 процент ӳстересси ҫинчен каланӑ.
Хушӑва пурнӑҫа кӗртсе яваплисен нормативлӑ документсене пӗр уйӑхра йӗркене кӗртсе пӗтермелле. Муниципалитет учрежденийӗсене те шалӑва 6 процент ӳстерсе пама сӗннӗ.
Паян, раштав уйӑхӗн 27-мӗшӗнче, «Чӑваштехинвентаризаци» хысна учрежденийӗн директорне Юрий Иванова ӗҫрен кӑларнӑ.
Асӑннӑ организаци республикӑн Экономика аталанӑвӗн тата пурлӑх хутшӑнӑвӗсен министерствине пӑхӑнать.
Юрий Иванова мӗн сӑлтавпа ӗҫрен кӑларнине республика ертӳҫин хушӑвӗнче каламан.
Ӗҫлӗ хута республикӑн ӗҫ тӑвакан влаҫ органӗсен официаллӑ порталӗнче вырнаҫтарнӑ.
Шупашкар районӗнчи Янӑш шкулӗн директорне ӗҫ вырӑнӗпе усӑ курнӑшӑн штрафланӑ. Ӑна РФ Пуҫиле кодексӗн 292-мӗш статйин 1-мӗш пайӗпе явап тыттарнӑ.
2021 ҫулхи нарӑс уйӑхӗнче ӗҫ укҫин фончӗн хавхалантару пайне валеҫекен комисси ӗҫ кӑтартӑвӗпе тухӑҫлӑхӗшӗн виҫӗ воспитателе пӗчӗк балл лартса пама йышӑннӑ. Воспитательсенчен пӗри шкул директорӗн тӑван хӗрӗ пулнӑ.
Шкул директорӗ хаклава палӑртакан приказа хӑй тӗллӗн улшӑну кӗртсе балсене ӳстерсе панӑ.
Ҫапла вара 2021 ҫулхи нарӑс уйӑхӗнчен пуҫласа раштавччен виҫӗ воспитателе хавхалантару укҫине 392 пин тенкӗ ытла йӗркене пӑсса куҫарса панӑ.
Суд шкул директорне 25 пин тенкӗ штраф хурса панӑ. Приговор хальлӗхе вӑя кӗреймен-ха.
Чӑваш Енре ҫывӑх вӑхӑтра 4 пин ытла ӗҫ вырӑнӗ уҫӑлӗ. Кун пирки республикӑн Правительствин Председателӗн ҫумӗ — экономика аталанӑвӗн тата пурлӑх хутшӑнӑвӗсен министрӗ Дмитрий Краснов ҫӗршывӑн экономика аталанӑвӗн министрӗ Максим Решетников ирттернӗ канашлура пӗлтернӗ.
Дмитрий Краснов социаллӑ-экономика аталанӑвӗн уйрӑм программинче 4 пин ытла ӗҫ вырӑнӗ уҫма пӑхса хӑварнине ӗнентернӗ. Программӑна аталантарма пуҫланӑранпа юлашки виҫӗ ҫул хушшинче 1414 ӗҫ вырӑнӗ уҫӑлнӑ. 2023–2024 ҫулсенче 3 140 ҫӗнӗ ӗҫ вырӑнӗ хушӑнмалла.
Паян Чӑваш Енӗн экономика аталанӑвӗн тата пурлӑх хутшӑнӑвӗсен министрӗ пулма Дмитрий Бельцова ҫирӗплетнӗ.
Уҫӑ ҫӑлкуҫсене тишкерсен, ҫавӑн пек ятлӑ ҫын юридици наукисен кандидачӗ пулни палӑрать.
Вӑл 1979 ҫулхи ҫу уйӑхӗн 2-мӗшӗнче Ҫӗмӗрле районӗнчи Якуртушкӑнь ялӗнче ҫуралнӑ. РФ Шалти ӗҫсен министерствин Юридици институчӗн Шупашкарти филиалӗнче вӗреннӗ. 1996 ҫултанпа шалти ӗҫсен органӗсенче ӗҫлет. Кунсӑр пуҫне вӑл И.Н. Ульянов ячӗллӗ ЧПУра юридици факультетӗнче преподаватель пулса тӑрӑшни паллӑ.
Паянтан Вӑрмар районӗн администрацине Василий Шигильдеев ертсе пырӗ. Унччен ку должноҫре Дмитрий Иванов ӗҫленӗ.
Василий Викторович 1966 ҫулта ҫуралнӑ, Мускавра ФСБ Академине пӗтернӗ. Хальхи вӑхӑтра «НПП «Каскад-ГРУП» тӗп директорӗнче вӑй хурать. Хӑй Чупай ялӗнче пурӑнать. Унччен ҫак ял тӑрӑхӗн депутачӗ пулнӑ.
Аса илтерер: Дмитрий Иванов администрацие 2020 ҫулхи ҫурлан 21-мӗшӗнченпе ертсе пынӑ.
Республикӑн онкодиспансерӗнче тӗп тухтӑрта икӗ уйӑх ӗҫленӗ хыҫҫӑн Светлана Баландина ку должноҫре тек тар тӑкмӗ. «Ҫыхӑнура» форумра пӗлтернӗ тӑрӑх, Чулхула хӗрарӑмӗ ӗҫрен эрнекун пӑрахнӑ.
2018 ҫултанпа асӑннӑ пульницӑра тӗп врач пиллӗкмӗш хутчен ылмашнӑ. Анчах Светлана Баландинӑна ҫитекен пулман – вӑл икӗ уйӑхранах тӗп врач пуканне пушатнӑ. Хӗрарӑма ку тилхепене юпа уйӑхӗн 17-мӗшӗнче тыттарнӑ, раштав уйӑхӗн 16-мӗшӗнче вӑл ӗҫрен кайнӑ.
Онкодиспансерӑн тӗп врачӗнче унччен ӗҫленӗ Сергей Карамаликов тӗлӗшпе ҫулла пуҫиле ӗҫ пуҫарнӑ.
Кӑҫалхи утӑ уйӑхӗн 11-мӗшӗнче Шупашкар районӗнчи пӗр предприятири арманта рабочие ток ҫапнӑ.
Унта пӗр арҫын ҫӑнӑх миххине ҫӗлессишӗн явапли пулнӑ. Аппаратчик должноҫӗнче тӑрӑшаканскер ӗҫе электричество оборудованийӗпе пурнӑҫланӑ. Анчах ҫав хатӗр патне пыракан ҫутӑ пӑралукӗ юсавсӑр пулнӑ. Ток ҫапнӑ арҫын вырӑнтах вилсе кайнӑ.
Предприятире ӗҫ хӑрушсӑрлӑхӗшӗн 77 ҫулти арҫын, техника директорӗ, яваплӑ пулнӑ. РФ Следстви комитечӗн Чӑваш Енри тӗпчевҫисем шухӑшланӑ тӑрӑх, ҫав этем хӑйӗн тивӗҫне ҫителӗклӗ пурнӑҫламан. Ӗҫри инкекшӗн техника директорне суд тенкелӗ ҫине лартӗҫ.
Чӑваш патшалӑх оперӑпа балет театрӗн илемлӗх ертӳҫине палӑртакан конкурс иртнӗ. Ӑна раштав уйӑхӗн 8-мӗшӗнче пӗтӗмлетнӗ. Илемлӗх ертӳҫин пуканне асӑннӑ театрта директорта ӗҫлекен Андрей Попов йышӑннӑ.
«Правда ПФО» тӗнче тетелӗнчи хаҫатра пӗлтерни тӑрӑх хакласан, илемлӗх ертӳҫи пулма пурӗ 5 ҫын ӗмӗтленнӗ. Конкурса хутшӑннисем — ятарлӑ професси пӗлӗвӗллӗскерсем, унсӑр пуҫне тӗп режиссёрта (дирижерта, балетмейстерта) виҫӗ ҫултан кая мар тӑрӑшнӑскерсем. Конкурс комиссийӗ пултарулӑх енчен Пермьри Андрей Попова ҫитекен ҫуках тесе пӗтӗмлетнӗ.
Ҫӗрпӳ районӗнчи Иккӗмӗш Вӑрманкас ял тӑрӑхӗн пуҫлӑхӗн тивӗҫӗсене вӑхӑтлӑха пурнӑҫлама 21 ҫулти Мария Ивановӑна шаннӑ.
Мария 2020 ҫулта Шупашкарти электромеханика колледжӗнчен "ЧПУ станокӗсен операторӗ" специальноҫпе вӗренсе тухнӑ. Вӑл И.Я.Яковлев ячӗллӗ Чӑваш патшалӑх педагогика университетӗнче "Физика вӗрентӗвӗн методики" специальноҫпе хатӗрленнӗ. Халӗ Мускав политехника университечӗн Шупашкарти филиалӗнче "Техника системинчи управлени" специальноҫпе 3-мӗш курсра вӗренет.
+3.3 °C